Filmsfelagið

Hvønn mikudag sýnir Havnar Bio, undir heitinum Filmsfelagið, nýggjar filmar, sum eru listaliga áhugaverdir, men tó ofta ókendir. Úti í heimi verður hetta slagið av filmum onkuntíð nevnt arthouse filmur.

Sjálvandi er ymiskt, hvat ein biografgangari og ein annar halda verða listaliga áhugavert og viðkomandi, men Havnar Bio roynir, við átakinum Filmsfelagið, við eini miðsøkjandi leið, sum annan vegin savnar áskoðarar og hin vegin gevur atgongd til film, sum ikki verður settur á vanligu skránna.

Havnar Bio heitti á Birgir Kruse, sum var formaður í gamla Filmsfelagnum, og Ole Wich, sum var nevndarlimur, at sleppa at brúka heitið og at velja filmar við ráðgeving frá filmsáhugaðum. Upprunaliga felagið varð stovnað í okkara hølum, Havnar Bio, í 1962 undir navninum Filmslistafelagið. Hetta felagið sovnaði í 1975. Í 1984 varð felagið endurstovnað sum Filmsfelagið og helt sær til 1992, oftast við sýningum í Leikhús Bio í Sjónleikarhúsinum. Tey, ið stjórna Filmsfelagið í dag eru: Birgir Kruse, Ole Wich og Rannvá Jónsdóttir.

Nú er Filmsfelagið endurstovnað í samráð við táverandi nevnd undir sama heiti og tí einfalda endamáli at vísa listaliga viðkomandi filmar í Havnar Bio. Filmarnir verða sýndir mikudagar.

Skráin hjá Filmsfelagnum verður kunngjørd í góðari tíð á Facebooksíðuni hjá felagnum, og á hesi heimasíðu, eins og galdandi er fyri allar aðrar filmar í Havnar Bio. 

Fylg Facebooksíðuni hjá Filmsfelagnum, har tey leggja tilfarð út um filmarnarFilmsfelagið Facebook Síða

Sýningarnar eru almennar og krevja ikki limaskap.

Vælkomin í Filmsfelagið!

Cornelis

Filmsfelagið: Mikukvøldið 20. Mars  kl. 20:00
Svenski journalisturin, Magnus Gertten, sum í 2014 gjørdi filmin Tusen Bitar um Björn Afzelius, hevur aftur gjørt ein heimildarfilm um ein stóran og fólkakæran svenskan tónleikara - trubadurin Cornelis Vreeswijk. Víðagitni og ikki sørt tiltikni sangarin vitjaði í Føroyum og sang á Jazzfestivalinum, innan hann andaðist bara 50 ára gamal í 1987. Sum navnið avdúkar, var hann føddur í Niðurlondum. Tólv ára gamal flutti hann við foreldrunum til Svøríkis. Í Svøríki gjørdist hann plátuskald, yrkjari, sum sang tekstirnar, ið ofta vóru samfelagsliga atfinnandi, og gav teir út á plátu. Hóast pressan javnt og samt lýsti hann sum ein buldrasligan konufólkarev, ið drakk illa, verður Cornelis í svenska tónleikaumhvørvinum mettur sum fremsti svenski trubadurur. Í hesum tvørskurði er tað, at Magnus Gertten, eins og í filminum um Björn Afzelius, eydnast at leggja lívsleiðina og avrikini hjá sangaranum opna fyri áskoðaranum.

Io Capitano

Filmsfelagið: Mikukvøldið 27. Mars kl. 20:00

Virðislønti italski leikstjórin, Garrone, sigur í hesum hugvekjandi filmi hendingaríku søguna um vinmennirnar Seydou og Moussa, sum fara úr Dakar í Senegal. Ikki tí tað er kríggj, ella at teir av øðrum ávum eru noyddir at rýma úr heimlandinum. Teir vilja bara til lovaða landið Evropa.

Hóast søgan fer fram í okkara tið, eru ummælarar, ið vísa til klassisku ferðasøguna hjá Homer um Odysseus, sum eisini er við í Ilionskvæðinum, sum Janus Djurhuus umsetti, og byrjar við griksku strendurnar í Ithaka.
Internet Movie Database sigur um nýggja italska filmin , at hann er: “A contemporary Odyssey through the dangers of the desert, the horrors of the detention centers in Libya and the perils of the sea.” Io Capitani, sum fyrr hevur vunnið fleiri virðislønir í Venezia og San Sebastian, er italska Oscaruppskotið í ár.

Nýskapandi filmurin megnaði at verða við heilt til endaumfarið í kappingini um besta altjóða film.

Leikstjórin Matteo Garrone (f.1968) hevur fyrr gjørt harðrendar filmar um italsk brotsmannalið í fátækastu landslutunum har suðuri í landinum. Teirra millum eru Gomorrah (2008) og Dogman (2018), sum Filmsfelagið áður hevur sýnt. Garrone hevur eisini gjørt film um kendasta persónin úr italskum søgum, Pinocchio (2019)

Dream Scenario

FILMSFELAGIÐ: MIKUKVØLDIÐ 03. Apríl Kl. 20:00

Norski Kristoffer Borgli, 39, hevur bæði skrivað og leikstjórnað gerandisligu søguna um púra anonyma læraran Paul Matthews (Nicolas Cage), sum fólk bráddliga fara at síggja í dreymi. Tað er karmurin um svørtu komediuna um mannin, sum eingin fyrr hevur varnast, men øll nú hava sæð, tosa um og skriva um á sosialu miðlunum. Nýggja dreymatilveran, The Dream Scenario, verður trupul at ferðast og navigera í, sum var tað ein marrudreymur. Fyri A24 hevur javnaldrandi amerikanski Ari Aster, sum fyrr hevur gjørt ræðufilmarnar Hereditary (2018) og Midsommar (2019), staðið fyri filmsgerðini. Norski Borgli hevur fyrr gjørt vælumtókta filmin Syk pike (2022). Norskir ummælarar geva nýskapandi filminum Dream Scenario besta ummæli. Aftenposten gevur fimm stjørnur og sigur, við eini siping til fyrra filmin, at hesin nýggi er "Sykt morsom". Aðrir norskir ummælarar siga, at filmurin er "Morsom, satirisk og underfundig med et overskudd av rampete kreativitet", og so stutt og greitt, at "Tidenes beste amerikanske film laget av en nordmann".

Il Boemo - En mesters storhed og fald

Filmsfelagið: Mikukvøldið 10. apríl 2024 kl. 20:00

Stórfilmurin Il Boeme er eitt tónlistaligt avrik um Josef Mysliveček, ið beint nú er kosið besti kekkiski filmur, sum byggir á besta handrit. Fyri avrikið fekk Il Boeme tvær gyltar kekkiskar leyvur. Tað er leikstjórin Petri Václav (f.1967), ið tvær ferðirnar fyrr hevur vunnið sama heiður, ið nú sigur okkum søguna um kekkiska tónaskaldið Josef Mysliveček, sum var føddur í Prag 1737, og hóast hann var mentor hjá Mozart, doyði fátækur í Rom bara 43 ára gamal. Tá hevði Mysliveček skrivað 30 operair, seks symfoniir og tólv strúkikvartettir. Il Boeme er eitt ævisøguligt drama, sum í stórari skreytuppseting lýsir tónaskaldið, sum hóast ídni og tætta knýtið til Mozart, í dag er teim flestu ókent. Internet Movie Data Base skrivar: “Looking for work as a violinist, Josef comes into the orbit of a rich young woman. She introduces him to a hedonistic existence free from religious intolerance. Josef gets an incredible commission: to write an opera for the San Carlo”. Umframt hugtakandi klæði og filmstøð, vekir stórbæri tónleikurin hjá Josef Mysliveček nýggjan áhuga fyri og innlit ókenda lívið hjá best umtókta operatónaskaldinum í italska 1700’talinum. Elsta filmstíðarritið, Variety, ger eisini vart við, at veruligar operastjørnur medvirka í nýggja filminum Il Boemo, sum verður sýndur við donskum undirteksti og undirheitinum En mesters storhed og fald: ”The award-winning Czech director Petr Vaclav has created a marvelous period piece, rich in costume and music, not to mention performances by real-life opera stars. Its glorious musical treatment is the film’s overriding pleasure. The film’s Italian milieu couldn’t be more vividly illustrated, fusing rich historical locations with grandiose design work”.

Før Stormen

FILMSFELAGIÐ: Mikukvøldið 8. Mai Kl. 20:00

Nýggi danski heimildarfilmurin, Før stormen, lýsir íbúgvarnar á oynni Mandø í Vadehavet, Vaðilin, sum røkkur frá Esbjerg til Den Heldur í Niðurlondum, har heitið er Waddenzee. Úr túninum eygleiða tey veðurlagsbroytingarnar tá ódn og vatnflóð herja á. Hóast hesar hóttanir, tvíhalda tey eins og forfedrarnir um gerandisdagin á oynni. Tey 27, sum búgva á Mandø, eru von við uppgang og ógvusligt veður. Veðurlagsbroytingarnar hava gjørt støðuna enn verri. Síðsti bóndin á oynni, Gregers, sum í ættini er hin áttandi, vil ikki gevast á hondum og flyta inn á fastlandið. Heldur vil hann finna eina konu, so tey saman kunnu reka garðin. Tá boðað verður frá stormi, fara Gregers og trúfasti hundurin at kanna gomlu flóðgarðarnar og hvørjum standi teir eru í at verja elskaða heimstaðin. Ímeðan blæsur Mie tey hundrað ljósini á lagkøkuni, Ellen og Ingeborg gremja seg um ta mánasjúku, sum pínir tær, fuglafrøðingurin Niels er stúrin um sjáldsomu fuglarnar, ið ikki longur eru at síggja, og ferðaleiðarin, Preben, roynir at siga summargestum stuttligar søgur. Hóast tey kenna veðurlagsbroytingarnar inn at beini, vilja tey búgva her. Filmiska lýsingin av hesum mikrokosmos er søgd í hugtakandi myndum í eyðkenda landslagnum, har himmal og hav eru í støðugari broyting millum flóð og fjøru. Filmurin verður sýndur nú Umhvørvisvika er í Havn, har havið er tema.