Filmsfelagið

Hvønn mikudag sýnir Havnar Bio, undir heitinum Filmsfelagið, nýggjar filmar, sum eru listaliga áhugaverdir, men tó ofta ókendir. Úti í heimi verður hetta slagið av filmum onkuntíð nevnt arthouse filmur.

Sjálvandi er ymiskt, hvat ein biografgangari og ein annar halda verða listaliga áhugavert og viðkomandi, men Havnar Bio roynir, við átakinum Filmsfelagið, við eini miðsøkjandi leið, sum annan vegin savnar áskoðarar og hin vegin gevur atgongd til film, sum ikki verður settur á vanligu skránna.

Havnar Bio heitti á Birgir Kruse, sum var formaður í gamla Filmsfelagnum, og Ole Wich, sum var nevndarlimur, at sleppa at brúka heitið og at velja filmar við ráðgeving frá filmsáhugaðum. Upprunaliga felagið varð stovnað í okkara hølum, Havnar Bio, í 1962 undir navninum Filmslistafelagið. Hetta felagið sovnaði í 1975. Í 1984 varð felagið endurstovnað sum Filmsfelagið og helt sær til 1992, oftast við sýningum í Leikhús Bio í Sjónleikarhúsinum. Tey, ið stjórna Filmsfelagið í dag eru: Birgir Kruse, Ole Wich og Rannvá Jónsdóttir.

Nú er Filmsfelagið endurstovnað í samráð við táverandi nevnd undir sama heiti og tí einfalda endamáli at vísa listaliga viðkomandi filmar í Havnar Bio. Filmarnir verða sýndir mikudagar.

Skráin hjá Filmsfelagnum verður kunngjørd í góðari tíð á Facebooksíðuni hjá felagnum, og á hesi heimasíðu, eins og galdandi er fyri allar aðrar filmar í Havnar Bio. 

Fylg Facebooksíðuni hjá Filmsfelagnum, har tey leggja tilfarð út um filmarnarFilmsfelagið Facebook Síða

Sýningarnar eru almennar og krevja ikki limaskap.

Vælkomin í Filmsfelagið!

DE TING, VI SIGER OG DE TING, VI GØR

Filmsfelagið: Mikukvøldið 22 September kl. 20:00

TAÐ, VIT SIGA, OG TAÐ VIT GERA (Les Choses Qu’on Dit, Les Choses Qu’on Fait, Emmanuel Mouret Frakland 2020 122 min)

Franski filmurin “Les Choses Qu’on Dit, Les Choses Qu’on Fait” er ein romantisk søga hjá leikstjóranum Emmanuel Mouret (f.1970) Camelia Jordana er í filminum hin unga Daphne, sum er við barn og fer at ferðast við sjeikinum. Men tá hann verður noyddur at fara aftur til arbeiðis í úrtíð, er Daphne einsamøll eftir við systkinabarni hansara, Maxime, í fýra dagar. Hesir dagar verða til eina óvæntaða romansu, sum broytir viðurskiftini millum tey trý. Filmurin verður sýndur í Filmsfelagnum mikudagin 22. september. Atgongumerkjasølan er byrjað.

Margrete den første

Filmsfelagið: Mikukvøldið 29. September kl. 20:00

(Charlotte Sieling DK 2021 120 min) 

Vit eru í árinum 1402, tá ein kvinna stendur á odda fyri einum nýggjum norðurlendskum stórríki, Kalmarsamveldinum. Margreta hin fyrsta (Trine Dyrholm) hevur savnað Danmark, Noreg og Svøríki og fingið tey trý londini at ganga saman í ein ríkjafelagsskap, sum hon einsamøll stýrir gjøgnum ættleidda sonin, Erik kong. Nógvir fíggindar liggja eftir henni og Ríkinum, og Margreta I ætlar tí at fáa Erik giftan við ensku prinsessuni Philippu. Eitt tílíkt samband við Ongland vildi styrkt Kalmarsamveldið og verið ein vernd móti álopum, hugsar hon. Men svikaráð, sum kunnu kosta alt, verða løgd móti henni. Nýggi søgufilmurin um Margretu I verður sýndur í Filmsfelagnum mikudagin 29. september. Atgongumerkjasølan er byrjað.

Det er ikke slut endnu

Filmsfelagið: Mikukvøldið 06. Oktober kl. 20:00

(Louise Detlefsen DK 2021 95 min)

Mikudagin 6. oktober fer Ann-Mari Jensen, forkvinna í Alzheimerfelagnum, at innleiða nýggja danska heimildarfilmin hjá Louisu Detlefsen ”Det er ikke slut endnu”.

Á fyrimyndarliga røktarheiminum Dagmarsminde fylgja vit sjúkrarøktarfrøðinginum og eldsálini, May Bjerre Eiby, sum ikki gongur so nógv upp í spesifikkar demensdiagnosur ella medisin, eftirsum hvørki tykjast bøta um lívsgóðskuna hjá teim ellivu búfólkunum. Í staðin hava May og hennara starvsfólk í størri mun lagt seg eftir einum viðgerðarhátti, sum byggir á 150 ára gomlu tankarnar hjá Florence Nightingale. May rópar viðgerina umsorgan, har fevnandi nærvera, samrøða, stuttleiki, eygasamband og kenslan av felagsskapi eru fremstu partar í uppskriftini. Endamálið er at kveikja verandi heilsuskipan og skapa fatan fyri einum nýggjum máta at vera um menniskju, ið verða rakt av demensi, uppá - at skifta frá medisini til umsorgan.

Skyggen i mit øje

FILMSFELAGIÐ: MIKUKVØLDIÐ 13. Oktober KL 20:00

(Ole Bornedal DK 2021 104 min)

Um morgunin hin 21. mars í 1945 gera nunnurnar og skúlanæmingarnir Rigmor, Eva og Henry klárt at byrja dagin í Franska Skúlanum á Frederiksberg. Langt burturi - hinumegin Norðsjógvin - gera bretskir flogskiparar hjá Royal Air Force klárt at hjálpa donsku mótstøðurørsluni í eini avgerandi atsókn. Teir hava sett kós móti Shellhúsinum mitt í Keypmannahavn har Gestapo hevur tikið sær høvuðssæti undir krígnum. Á ovastu hædd hava týskarar sett 26 danskar fangar sum livandi skjøldur. Álopið eydnast, men stutt frá hesum staðnum hendur ein vanlukka. Eitt flogfar er dottið niður við Franska Skúlan. Eldur kemur í og í ringa sýninum fær roykurin hini bumbuflogførini at halda, at bumbumálið fjalir seg undir roykinum á Fredriksberg. Føroyska Alice var ein av gentunum, sum kom við lívinum frá hendingini. Hon andaðist í 1987 og er grivin í Nýggja kirkjugarði við Velbastaðvegin í Havn. Í sterka krígsfilminum, sum hevur fimtan ára aldursmark, fylgja vit børnunum Henry (Bertram Bisgaard), Eva (Ella Nilsson) og Rigmor (Ester Birch) og næstrafólkum teirra, nunnuni Teresu (Fanny Bornedal), danska HIPO manninum Frederik (Alex Høgh Andersen), bretsku flogskiparunum Peter (Alban Lendorf) og Andy (James Tarpey), og tveimum mótstøðumonnum, sum verða fangaðir. Teir eru Jens Sætter-Lassen og Joen Højerslev. Foreldur at børnunum eru m.a. Danica Curcic, Mads Riisom, Kristian Ibler, Malene Beltoft og Maria Rossing.

Skaknovelle

FILMSFELAGIÐ: MIKUKVØLDIÐ 20. Oktober KL 20:00

(Philipp Stölzl Týskland 2021 110 min)

Nýggi týski filmurin ”Schachnovelle” byggir á metsølubókina, sum eysturríkski Stefan Zweig skrivaði í Brasil frá 1938 til 1941, tá hon kom út og gjørdist hansara seinasta og kendasta ritverk. Hetta er ein stórbærur sálarfrøðiligur spenningsleikur, meistarliga filmaður og kliptur sum tað sømir seg einum avgerandi talvi, har spælt verður um lívið og tilveruna. Vit eru í Wien í 1938. Nasistarnir hava tikið Eysturríki og sakførarin Bartok verður handtikin og settur í Hotel Metropol, har Gestapo er flutt inn og hevur gjørt sær høvuðssæti. Nasistarnir vita, at Bartok hevur koturnar til allar tær risaupphæddir, sum múgvandi fólk hava í bankanum. Tá Bartok noktar at geva nasistunum koturnar, verður hann avbyrgdur í einum kliva. Í einum marrudreymi, sum í ”Shutter Island” (2010) gera nasistarnir alt, teir eru mentir at taka mótið frá Bartok og bróta hann niður sum menniskja. Men eingin veit, at Bartok hevur fjalt eina heilt serliga bók, sum hann hevur hjá sær í klivanum. Tað er ein bók um talv, ið gevur søguni og filminum navn. Nú verður kappingin millum Bartok og nasistarnar eitt talv, har hvør leikur elvir til ein mótleik, har lívið er uppá spæl. Leikarar eru Oliver Masucci, Birgit Minichmayr og Rolf Lassgård. Týski Gerd Oswald gjørdi film úr somu søgu í 1960.

Fagre voksne verden

Filmsfelagið: Mikukvøldið 27. Oktober kl. 20:00

The Graduate (Mike Nichols USA 1967 106 min)

Undir heitinum ”Fagre voksne verden” vísa vit amerikanska Oscarvinnaran og klassikaran frá 1967, ”The Graduate”, har Dustin Hoffmann spælir ungi studenturin, Braddock, sum Mrs. Robinson brúkar til casual sex, eins og Trine Dyrholm førdi víðari í danska filminum ”Dronningen” (2019). Leikstjóri er Mike Nichols, sum byggir á skaldsøgu hjá Charles Webb. Vit fylgja Ben Braddock (Dustin Hoffman), sum er nýklæktur studentur og ikki dugir at fóta sær í lívinum. Foreldrini skipa fyri studentaveitslu, har hin tilkomna Mrs. Robinson (Anne Bancroft), ið er gift starvsfelagnum hjá pápanum, forførir Ben og lærir hann alt um sex og hvat ein búgvin kvinna vil hava frá einum ungum manni. Men tá ungi elskarin Ben fær heitar kenslur fyri dóttir hennara, Elaine (Kathrine Ross), verður tað ovboðið og tilveran fer í grús. Við titulsanginum ”Mrs. Robinson” blivu Simon & Garfunkel kendir av álvara, og filmurin førdi Dustin Hoffmann fram millum fremstu stjørnur í leiklutinum sum ungi maðurin við ultimativa studentadreyminum at verða forførdur av eini búnari kvinnu.

Kandis for livet

Filmsfelagið: Mikukvøldið 3. November kl. 20:00

(Jesper Dalgaard DK 2021 85 min)

Halelujah Sofus innleiðir Kandis-Johnny Haleluja Sofus innleiðir ”Kandis for livet”, ið er ein lívsjáttandi, undirhaldandi og hjartanemandi filmur um ein breiðan skara av áhoyrarum, sum dyrka Kandis, og hava eitt heilt serstakt samband við dansk-topp sangaran Kandis-Johnny, ið gevur troystartríkar og meiningsfullar løtur. Uttan sminku og nakað tilgjørt sleppa vit afturum idolið, Kandis-Johnny, og hitta fólk úr áhoyraraskaranum. Hóast tey ikki kennast, hava tey eitt tætt og sterkt knýti til fremsta dansiorkestrið í Norðurlondum, har Johnny av summum verður fataður sum ein Personal Jesus, ið Depeche Mode syngja um. Filmurin bjóðar okkum innar í almennar medmenniskjansligar søgur um eydnuleysan kærleika, einsemi, at siga farvæl við tey, tú elskar og at endurfinna mista kærleikan. Í hesum bergtakandi heimildarfilmi verður gjørt greitt, at einsamallur kann eingin kann reisa seg aftur.

coda

Filmsfelagið: Mikukvøldið 10. November kl. 20:00

(Sian Heder USA 111 min)

CODA er stytting fyri Child of Deaf Adults. Karmurin um filmin er deyva húskið Rossi í útróðrarumhvørvinum Glouster í Massachusetts, har Ruby (Emilia Jones) er hin einasta, ið hoyrir. Mamman er Marlee Matlin, sum í veruleikanum er deyv, og í 1986 vann Oscarvirðislønina fyri fyrsta leiklutin á filmi, tá hon var Sarah í ”Children of a Lesser God”. Nýggi filmurin CODA er upptikin á somu leiðum sum hin meistarligi “Manchester by the Sea” (2016). Tá útróðurin hjá Rossi og teimum ikki gongst eftir vild, verður tilveran hjá Ruby trupul. Nú skal hon velja millum antin at verða heima og hjálpa trongda húskinum, ella fara at lesa tónleik, sum hon altíð hevur droymt um.

Two of us

Filmsfelagið: Mikukvøldið 17. November kl. 20:00

 

Komandi filmar hjá Filmsfelagnum