Filmsfelagið

Hvønn mikudag sýnir Havnar Bio, undir heitinum Filmsfelagið, nýggjar filmar, sum eru listaliga áhugaverdir, men tó ofta ókendir. Úti í heimi verður hetta slagið av filmum onkuntíð nevnt arthouse filmur.

Sjálvandi er ymiskt, hvat ein biografgangari og ein annar halda verða listaliga áhugavert og viðkomandi, men Havnar Bio roynir, við átakinum Filmsfelagið, við eini miðsøkjandi leið, sum annan vegin savnar áskoðarar og hin vegin gevur atgongd til film, sum ikki verður settur á vanligu skránna.

Havnar Bio heitti á Birgir Kruse, sum var formaður í gamla Filmsfelagnum, og Ole Wich, sum var nevndarlimur, at sleppa at brúka heitið og at velja filmar við ráðgeving frá filmsáhugaðum. Upprunaliga felagið varð stovnað í okkara hølum, Havnar Bio, í 1962 undir navninum Filmslistafelagið. Hetta felagið sovnaði í 1975. Í 1984 varð felagið endurstovnað sum Filmsfelagið og helt sær til 1992, oftast við sýningum í Leikhús Bio í Sjónleikarhúsinum. Tey, ið stjórna Filmsfelagið í dag eru: Birgir Kruse, Ole Wich, Rannvá Jónsdóttir og Jana Mortensen

Nú er Filmsfelagið endurstovnað í samráð við táverandi nevnd undir sama heiti og tí einfalda endamáli at vísa listaliga viðkomandi filmar í Havnar Bio. Filmarnir verða sýndir mikudagar.

Skráin hjá Filmsfelagnum verður kunngjørd í góðari tíð á Facebooksíðuni hjá felagnum, og á hesi heimasíðu, eins og galdandi er fyri allar aðrar filmar í Havnar Bio.

Fylg Facebooksíðuni hjá Filmsfelagnum, har tey leggja tilfarð út um filmarnar: Filmsfelagið Facebook Síða

Sýningarnar eru almennar og krevja ikki limaskap.

Vælkomin í Filmsfelagið!

Komandi filmar hjá Filmsfelagnum

Kvøldvakt

Filmsfelagið: Mikukvøldið 27. mai kl. 20:00

Tað er ein heilt vanligan gerandisdag, at sjúkrarøktarfrøðingurin Floria (Leonie Benesch) møtir á kvøldvakt á skurðdeildini á einum sveisiskum sjúkrahúsi. Hon heilsar starvsfeløgunum og vit fata Floriu sum vællýdda og samvitskufulla. Og tað er hon eisini noydd at vera. Tí tey eru ov fá starvsfólk á kvøldvaktini og í dag eru ongar sengur tómar. So hon er um tey øll, frá sjúklingum, ið liggja fyri deyðanum, til eldra mannin, ið bíðar eftir eini diagnosu, frú Frei, sum vil hava frið at roykja, og ikki um at tala krevjandi ríkmannin, sum tryggingin hevur sent til viðgerðar. Meðan Floria rennir frá stovu til stovu í eini roynd at røkka øllum, eru alla tíðina nýggj boð um íkomnar støður, sum bráðfeingis krevja at hon á ein nýggjan hátt eisini er um sjúklingarnar, ið eru á gongini. Meðan náttin nærkast, verður runnið so skjótt um kapp við klokkuna, at avleiðingarnar kunnu gerast álvarsligari, enn Floria bríggjar seg um. Malan Lützen, sjúkrarøktarfrøðingur, fer at innleiða sýningina.

Vernd

Filmsfelagið: Mikukvøldið 03. juni kl. 20.00

Í nýggja svarthvíta svenska spælifilminum, "Värn", eru vit í fyrstu sjeytiárunum. Kalda kríggið er í hæddini, og við støði í bóklinginum "Om kriget kommer", ið stjórnin hevur givið út síðan 1943, fer bønarmaðurin og einabúgvin, Karl-Göran (Denis Lavant), at tryggja bústaðin. Leingi hevur hann savnað jarn og annað burturkast, sum hann nú lagar fyri húsið og ger eitt verndarvirki, skuldi kríggið brostið á her um leiðir. Maniska savnaralyndi verður á poetiskan hátt hildið upp móti fábroytta gerandislívinum á bygd í teim vakrastu svørthvítu myndum. Hóast poetisk, er lýsingin av einabúgvanum ótilgjørd, rá og ómild. Júst tí verða vit nomin av, hvussu aktuellur og viðkomandi lítillætni filmurin er júst í okkara tíð, nú allir miðlar hvønn dag hava kríggj og kreppu ovast á breddanum og seta karm um okkara gerandisprát.

HJEM

Filmsfelagið: Mikukvøldið 10. juni kl. 20:00

Seinasti filmur í Filmsfelagnum fyri summarsteðgin er fyrsti filmur, sum sjónleikarin Marijana Jankovic (f.1982), stjórnar. Hon var seks ára gomul, tá húskið flutti úr Montenegro til Danmarkar. Filmurin tekur við í 1991 tá stríð er á Balkan og alt dettur sundur. Vónleysa støðan ger, at seks ára gamla Maja fer við foreldrunum til Danmarkar, meðan teir báðir beiggjarnir eru eftir, men skjótt skulu verða aftur saman við teimum. Men lovaða landið, Danmark, er ein avbjóðing hjá tilflytarunum, og serliga Maju, sum undrandi eygleiðir foreldrini, tá tey í einum og øllum laga seg til atferð og siðir í nýggja landinum. Meðan mamman og pápin stríðast, og mugu sanna at nýggja landið er ikki eitt ævintýraland, kemur Maja skjótt eftir fremmanda danska málinum, og verður vaksnamannaálitið hjá foreldrunum. Nógv ár seinni er hon kend listakvinna í Danmark. Men undir listaligu eydnuni er ein syndran av gleðiskensluni, sum fer frá gleði til sorg og aftur til takksemi fyri nýggja lívið, hon hevur fingið, og tað strev, foreldrini hava tikið á seg, so hon sjálv kundi fáa eitt sorgleyst lív - men alt hevur ein prís. Leikarar eru Dejan Cukic, Jesper Christensen, Claes Bang, Zlatko Burić, Jesper Christensen, Nada Sargin og Trine Dyrholm.